Danskur, fullur eða vitlaus.

Danir eru aumingjar.  Þessa fullyrðingu heyrði ég í matarboði hjá roskinni frænku minni. Maðurinn hennar hélt þessu fram og hélt áfram, sagði t.d. að danska væri ekki tungumál, Danir hefðu skemmt norskuna og væru með puttana í öllu, hann sumsagt hatar Dani. Sjálfur er hann Norðmaður, búsettur í Svíþjóð. Heyrði seinna að honum væri einnig í nöp við sænska kónginn.  Þetta er fínn kall og skemmtilegur.

Danir eru greinilega víðar litnir hornauga en í Norður-Atlantshafi og í Araba-löndunum, Svíar og Norðmenn eru heldur ekki hrifnir af þeim. Maður hefur svosem oft heyrt svona umtal um Dani heima á Íslandi, en sjálfsagt allt meint í góðu og biturleikinn eftir nýlendutímann ristir grunnt í Íslendingum, allavega er flogið þangað fjórum sinnum á dag og allir sem ég þekki hafa farið til Danmerkur, yfirleitt í skemmtiferðir. Kannski að fullir Íslendingar séu hefnd fyrir nýlendutímann og svo náttúrulega útrás Íslenskra auðjöfra.

Ertu danskur, fullur eða vitlaus ? 

Athugasemdir

[Jón Steinar Ragnarsson, 2.3.2007 kl. 03:53]

Íslendingar voru nú fullir í Köben á nýlendutímanum líka, svo það er engin breyting þar á. Hefndin liggur kannski í að kaupa upp krúnudjásnin í viðskiptalífi þeirra eins og Magasín du Nord og Bang og Olofsen ásamt því að grafa undan BT.

Persónulega finst mér danir ljómandi fólk, sem kann þá lífskúnst að lifa fyrir líðandi stund. 

[Einar Ísaksson, 3.3.2007 kl. 21:33]

Það er gott að Danir eigi aðdáendur einhversstaðar.